नमस्कार !

शिक्षण हा प्रत्येक मुलाचा अधिकार आहे.तसेच बालरंगभूमी ही प्रत्येक बालकाची गरज आहे. मनोरंजनातून प्रबोधन करणारी बालरंगभूमी ही बालमनावर संस्कार करते. बालकांचे व्यक्तिमत्त्व घडवते. मुलांच्या मनोरंजनासाठी आणि प्रबोधनासाठी मंचावरून जे जे सादर होते… ती बालरंगभूमी!

बालरंगभूमीची ही सोपी, सुटसुटीत व्याख्या स्वीकारून “बालरंगभूमी परिषदेची” स्थापना जुलै २०१८ मध्ये झाली. बालरंगभूमी परिषदेला ‘अखिल भारतीय मराठी नाट्य परिषदेची’ मान्यता मिळून त्या संस्थेशी संलग्न राहण्याचा संकल्प बालरंगभूमी परिषदेच्या घटनेत आहे. बालरंगभूमी परिषद ही नाटय परिषद प्रमाणे फक्त नाटय क्षेत्राशी संबंधित नसून, नृत्य, गायन, वादन, जादू इत्यादी कला प्रकारांच्या प्रचार आणि प्रसारासाठी कटिबध्द आहे.

बालरंगभूमी परिषद स्थापना झाल्यावर पहिल्या पाच वर्षात जिल्हावार शाखा स्थापन करून परिषदेच्या विस्ताराचे कार्य प्रामुख्याने झाले. आज २३ शाखा कार्यरत आहेत आणि पाच शाखा लवकरच कार्यरत होतील. प्रत्येक जिल्ह्यात, तालुक्यात आणि शहरात बालनाट्य, गायन, वादन, संगीत आणि नृत्याशी संबंधित अनेक संस्था कार्य करत असतात.”बालरंगभूमी परिषद” या संस्थांच्या मदतीसाठी “शीर्ष संस्था” म्हणून कार्य करणार आहे. मुलांचा आणि त्यांच्यातील कलागुणांचा विकास होण्यासाठी विविध कला महोत्सवाचे आयोजन परिषद करत आहे.

ऑगस्ट – सप्टेंबर महिन्यात “लोककला महोत्सव साजरा केला जाईल. ऑक्टोबर महिन्यात “विशेष मुलांच्या कला प्रदर्शनाचा” उत्सव होईल. नोव्हेंबरमध्ये १०० व्यां नाटय संमेलनात बालरंगभूमी परिषदेचे विविध कार्यक्रम संमेलनाची शान आणि शोभा वाढवतील. जानेवारी महिन्यात “बालनाट्य महोत्सव” साजरा करून बालनाट्य चळवळीची पाळेमुळे अधिक घट्ट करून ती ग्रामीण भागापर्यंत पोहचविण्यात येतील. याच महोत्सवातील सर्वोत्तम बालनाट्यांचे ५० प्रयोग बाल प्रेक्षकांसाठी राज्यातील विविध ठिकाणी करण्यात येतील.