दि. २७ सप्टेंबर २०२४
कल्याण येथे बालकलाकारांचा लोककलेचा महाजल्लोष
बालरंगभूमी परिषद मध्यावर्तीच्या अध्यक्षा ॲड.निलम शिर्के – सामंत यांच्या संकल्पनेतून “जल्लोष लोककलेचा” हा लोककला महोत्सव २७ सप्टेंबर २०२४ रोजी आचार्य अत्रे रंगमंदिर येथे मोठ्या दिमाखात संपन्न झाला.बालरंगभूमी परिषद मध्यवर्ती आयोजित,बालरंगभूमी परिषद कल्याण शाखेने कल्याण डोंबिवली महानगर पालिका शिक्षण विभागाच्या सहकार्याने या कार्यक्रमाचे आयोजन केले होते.सांघिक नृत्याने महोत्सवाची दणक्यात सुरुवात झाली. गोंधळ, जोगवा, शेतकरी नृत्य, कोळी नृत्य बघून पाहुणे प्रेक्षक भारावून गेले. सांघिक गायन, एकल वादन, एकल गायन, एकल नृत्य अश्या एकापेक्षा एक लोकनृत्याचे सदरिकरण झाले.रसिकप्रेक्षकांनी टाळ्यांच्या गजरात उत्तम प्रतिसाद दिला. व कल्याण शाखेला उत्तम नियोजन करून कलावंतांना रंगमंच उपलब्ध करून दिल्याबद्दल धन्यवाद दिले. सादरीकरण संपल्यानंतर लगेच पुरस्कार वितरण सोहळा पार पडला. प्रमुख पाहुणे म्हणून लोककलावंत श्री.संदेश विठ्ठल उमप, श्री.हेमंत यादगिरे,श्री.रवींद्र सावंत, श्री माणिक शिंदे, मान्यवर परीक्षक व बालरंगभूमी परिषद कल्याण शाखेचे पादाधीकारी या मान्यवरांच्या हस्ते पुरस्कार वितरण सोहळा पार पडला. कार्याध्यक्ष श्री.शिवाजी शिंदे यांनी कल्याण डोंबिवली महानगर पालिकेचे आयुक्त व शिक्षण विभागाचे उपायुक्त व पदाधिकारी यांनी अत्रे रंगमंदिर उपलब्ध करून दिल्याबद्दल सर्वांचे आभार मानले.लोकलेची मराठमोळी वेशभूषा करून विकास सोनवणे यांनी निवेदनात रंगत आणली.